北愛賽 騰晒雞過關 顏丙濤挑戰威廉斯爭標

嘩嘩嘩,17歲中國天才小將顏丙濤打入北愛爾蘭桌球公開賽決賽呀!呢位山東小將尋晚喺貝爾法斯特舉行嘅北愛公開賽4強戰「中國打吡」中,發揮強橫後勁,以局數6比2打敗同胞呂昊天,創出個人排名賽最佳成績,殺入決賽,今晚佢將會硬撼兩屆世界冠軍「黃金左手」威廉斯爭冠軍!如果「丙哥仔」最終贏得冠軍,更會打破「火箭」奧蘇里雲喺93年創出嘅17歲358日最年輕排名賽冠軍紀錄,新紀錄將可能會係顏丙濤嘅17歲284日,大家今晚記得為佢打氣呀!

講番尋晚場「中國打吡」,雙方頭兩局都發揮麻麻,打成局數2比2平手,不過小休之後,就係「丙哥仔」世界,佢一口氣連贏4局,就將19歲嘅北京小將呂昊天砌低,取得決賽資格。顏丙濤今場發揮以後段較佳,佢分別喺第4、6同8局「起迫」73、75同114度,成為贏波關鍵。賽後佢自己都承認早段表現「騰雞」,超級緊張:「其實喺第一節,我哋兩個都好緊張。我哋過去一直一齊喺同一個地方練波,所以熟晒對方波路,好彩係第一節小休之後,我成功調整番,打番出水準,壓制住自己嘅緊張心情,先可以贏到波。之前我打咗唔少半準決賽同準決賽,係呢啲經驗令我變得強大。」顏丙濤話自己偶像係奧蘇里雲,仲話如果真係可以打破「火箭」嘅紀錄,會感到無上光榮喎。

至於「丙哥仔」決賽對手威廉斯,佢喺4強以局數6比2淘汰英格蘭新星施利梳,闖入佢個人歷來第31個排名賽決賽。威廉斯今場發揮正路,先後有3Cue「50+」,另外喺第2局打出一Cue 127度,贏得輕鬆。呢位「黃金左手」賽後自爆今季前曾諗過退役,但好彩喺佢老婆鼓勵下先延續球員生涯,繼續努力爭勝。不過夜晚佢喺Twitter透過佢太太因病突然入咗醫院,聲言唔排除會退出決賽,只係之後世界桌總就喺Twitter作出回應,強調決賽會如常進行喎!點都好,希望威廉斯太太無礙,佢又可以專心比賽,今晚同顏丙濤合演好戲啦!決賽會喺今晚開打,採17局9勝制。(now 637周日晚9點及周一凌晨3點直播)

東網體育同你追實體壇每個精彩時刻! 
https://goo.gl/ewVpvE 


本文來源:http://hk.on.cc/hk/bkn/cnt/sport/20171126/bkn-20171126172139841-1126_00882_001.html